Feed

Dagur bókarinnar er 23. apríl og var það Menningarmálastofnun Sameinuðu þjóðanna (UNESCO) sem átti frumkvæðið að því að gera þennan dag að alþjóðadegi bóka. Markmiðið er að hvetja fólk, og þá einkum ungt fólk, til að lesa meira og kynna sér verk þeirra fjölmörgu höfunda sem hafa auðgað líf mannkyns um aldir. Svo skemmtilega vill til að að Nóbelskáldið okkar, Halldór Laxness, fæddist 23. apríl. Sem UNESCO-skóli var skipulögð dagskrá hjá okkur í MTR í tilefni dagsins, var hún haldin 21. apríl þar sem sá 23. er frídagur þetta árið. Starfsfólkið greip með sér sínar uppáhaldsbækur að heiman og voru þær til sýnis og skoðunar á sal skólans. Nemendur og starfsfólk tóku þátt í skemmtilegri spurningakeppni um bókmenntir þar sem 30 fjölbreyttar spurningar reyndu á kunnáttu svarenda í hinum ýmsu bókmenntagreinum. Einnig svöruðu bæði nemendur og kennarar könnun þar sem spurt var um uppáhaldsbækur þeirra og ástæðuna fyrir því vali. Voru niðurstöður settar upp í líflegt orðaský. Að lokum lék Hamingjubandið, skipað kennurum og nemanda, nokkur lög við góðar undirtektir. Í tilefni dagsins urðu fyrir valinu lög sem samin hafa verið við íslensk ljóð. Tókst vel til og líflegar umræður sköpuðust um bækur og bókmenntir og þar með var tilganginum náð.

Dagana 15. - 20. mars dvöldu nokkrir nemendur af listnámsbraut í Gautaborg til að kynna sér söfn, myndlistarskóla, gallerí og vinnustofur listamanna þar í borg. Flogið var frá Akureyri til Manchester og þaðan til Kaupmannahafnar þar sem tekin var lest yfir til Svíþjóðar. Það var ekki að ástæðulausu að Gautaborg varð fyrir valinu því þar býr og starfar myndlistarkennari skólans Bergþór Morthens meirihluta ársins. Hann skipulagði áhugaverða dagskrá fyrir nemendur sem sáu og upplifðu ýmislegt spennandi á listasviðinu auk þess að kynnast menningu Svíþjóðar. Tilgangur ferðarinnar var að auka víðsýni nemenda sem og þekkingu á ólíkum stefnum og stílum í myndlist. Fyrsta daginn var farið í grasagarð til að skoða arkitektúr og fjölbreyttan gróður sem og í stærsta almenningsgarð borgarinnar, Slottsskogen, þar sem m.a. er dýragarður með ýmis skandinavísk dýr. Einnig var gengið um gamla hluta borgarinnar þar sem nemendur upplifðu líflegt mannlíf og kynntust sænskri kaffihúsamenningu auk þess að beina athyglinni að hönnun gamalla bygginga. Dagur tvö var helgaður Listasafni Gautaborgar, Konstmuseet, þar sem farið var um sali og fjölbreytt verk skoðuð. Þar tóku nemendur einnig upp skissubækur og teikniáhöld og reyndu sig í teikniæfingum til að dýpka skilning á formi, línum og teiknitækni. Var það góð upphitun fyrir þriðja daginn þar sem farið var í skólaheimsóknir. Fyrst var formleg heimsókn í Domen Konstskola, einn fremsta listaskóla Svíþjóðar, og síðan var litið inn í listaháskólann HDK Valand. Þótti nemendum mjög fróðlegt að sjá hvernig kennslan fer fram í þessum skólum og þá glæsilegu aðstöðu sem þar er í boði. Þennan dag var Heiðbrá Sól, fjarnemi við MTR sem búsett er í Gautaborg, með hópnum. Síðustu tveir dagarnir voru helgaðir heimsóknum á söfn og vinnustofur listafólks. Markmiðin voru annars vegar að skoða samtímalist og hönnunarsögu og hins vegar að sjá listamenn við störf í sínu raunverulega vinnuumhverfi. Þótti nemendum sérlega áhugavert að komast í návígi við fjölbreyttan hóp listafólks sem sinnti ýmiskonar list, sjá vinnuaðstöðu þeirra og ræða við þau um listsköpun og líf listafólks. Ferðin var hin ánægjulegasta, þó ferðalagið til Svíþjóðar hafi verið nokkuð krefjandi, og sáu nemendur margt fróðlegt og áhugavert. Milli dagskrárliða var tíminn nýttur til að versla og fá sér að borða á fjölbreyttum veitingastöðum og kaffihúsum. Svo þurfti að sjálfsögðu líka að sinna heimanáminu, því líkt og allar aðrar námsvikur í MTR þurfti að skila sínum verkefnum í hinum ýmsu greinum í síðasta lagi á sunnudagskvöldi.

Einn af þeim áföngum sem er kenndur á þessari önn er fjölmiðlafræði. Á dögunum fengu nemendur það verkefni að skrifa grein sem tengdist skólanum. Einn nemendanna, Guðmundur Vigri Sigurvinsson, tók áhugavert viðtal við fyrrverandi nemanda skólans, Svölu Marý, sem útskrifaðist af félagsvísindabraut í desember 2020. Veittu þau bæði leyfi fyrir því að viðtalið væri birt á heimasíðu skólans.

Eins og áður hefur komið fram fáum við mikið af heimsóknum frá erlendum kennurum sem vilja kynna sér skólastarfið hjá okkur. Nokkrir hópar hafa komið á þessari önn og í vikunni fyrir páskafrí voru hér kennarar frá Spáni, Austurríki og Danmörku í gegnum Erasmus+ samstarf. Markmið þeirra var að kynnast kennsluháttum í skólanum og fá að fylgjast með kennslu. Að lokinni heimsókn var lögð könnun fyrir hópinn og niðurstöður hennar sýna að heimsóknin þótti afar vel heppnuð.

Innritun í fjarnám á haustönn 2026 hefst þriðjudaginn 7. apríl n.k. Umsækjendur sækja um gegnum vef skólans,

Það hefur verið gestkvæmt hjá okkur að undanförnu, svona á milli óveðursdaga. Við höfum m.a. fengið til okkar tvo nemendahópa til að kynna sér hvernig náminu hjá okkur er háttað og hvernig lífið gengur fyrir sig í skólanum. Fyrir tveimur vikum komu nemendur 10. bekkjar Dalvíkurskóla í heimsókn og í morgun voru það 10. bekkingar í Grunnskóla Fjallabyggðar sem sóttu okkur heim. Báðum hópum var skipt upp í smærri einingar sem fóru á milli stöðva í skólahúsinu. Þeirra biðu ýmis verkefni og kynningar til að fá innlit í skólastarfið. Fulltrúar nemendaráðs höfðu útbúið spurningar um skólann sem þau lögðu fyrir gestina auk þess sem þau sögðu frá félagsstarfi nemenda og skólastarfinu eins og það kemur nemendum fyrir sjónir. Í listastofunni spreyttu gestirnir sig í að teikna hvert annað, í ljósmyndastofunni voru teknar líflegar myndir auk þess sem gripið var í hljóðfæri og slegið á létta strengi. Náms-og starfsráðgjafi kynnti gestunum hvernig náminu er háttað, gerði grein fyrir hinu mikla erlenda samstarfi sem skólinn á í og ýmsu fleira spennandi sem er í gangi hjá okkur og síðast en ekki síst var farið í heimsókn í tölvuleikjastofuna þar sem leiknin í hinum ýmsu leikjum var reynd. Að loknu hópastarfinu var boðið upp á pizzuveislu og þótti það ekki ónýtt. Var ekki annað að sjá og heyra en gestirnir væru ánægðir með það sem bar fyrir augu og eyru og þó nokkrir lýstu yfir áhuga á að koma hér til náms næsta haust. Þökkum við þessum líflegu hópum fyrir komuna og vonumst til að sjá þau sem flest hér næsta vetur.

Einn af alþjóðadögum Sameinuðu þjóðanna er Alþjóðlegur dagur hamingjunnar. Hefur hann verið haldinn hátíðlegur þann 20. mars frá árinu 2013 til að minna á að hamingjan sé almennur réttur og markmið allra jarðarbúa. Dagurinn er notaður til að stuðla að velsæld, gleði og jákvæðni með ýmsum samfélagslegum viðburðum sem einstaklingar, fyrirtæki og stofnanir taka þátt í. Dagurinn fellur undir þriðja heimsmarkmið Sameinuðu þjóðanna sem snýst um heilsu og vellíðan. Menntaskólinn á Tröllaskaga vinnu markvisst með heimsmarkmiðin og í tilefni dagsins voru nemendur hvattir til að mæta í skólann í klæðnaði sem þeim liði sérstaklega vel í. Auk þess var skorað á nemendur og starfsfólk að setja á sérstaka myndasíðu myndir af því sem veitti þeim hamingju. Var áhugavert að sjá hversu margar myndir sýndu útivist, hreyfingu og samveru en auk þess var kaffi og súkkulaði áberandi á kennaravængnum. Til að auka hamingju dagsins var boðið upp á súkkulaðikökur að loknum hádegisverði. Var ekki annað að sjá en hamingjustuðullinn hækkaði töluvert við það.

Síðasta vika var miðannarvika í skólanum. Í þeirri viku vinna kennarar að námsmati en nemendur sitja tveggja eininga áfanga sem að þessu sinni snerist um að útbúa og talsetja vandað lesefni fyrir börn. Markmið áfangans var m.a. að vekja nemendur til meðvitundar um mikilvægi þess að búa vel að íslenskukennslu fyrir nýja íbúa samfélagsins, án þess að útiloka íslensk börn, og stuðla að auknum skilningi á hlutverki tungumáls í námi, samskiptum og samfélagslegri þátttöku. Var vinnu vikunnar einnig ætlað að stuðla að því að nemendur upplifðu að verk þeirra hafi tilgang og gildi utan skólastofunnar og þeir geti tekið þátt í að efla læsi, aðgengi og inngildingu í samfélaginu.

Menntaskólinn á Tröllaskaga er heilsueflandi framhaldsskóli og leggur áherslu á að hlúa að líkamlegri sem andlegri heilsu nemenda og starfsfólks. Er það gert með ýmsum hætti og má þar m.a. nefna árlega þátttöku starfsfólks í Lífshlaupinu, heilsu- og hvatningarverkefni Íþrótta- og Ólympíusambands Íslands. Lífshlaupið stóð yfir allan febrúarmánuð að þessu sinni og tók fjöldi vinnustaða vítt og breitt um landið þátt. Rúmur helmingur starfsfólks MTR var með í ár og hreyfði sig í rúmar 22 þúsund mínútur þær fjórar vikur sem átakið stóð. Um 160 vinnustaðir voru í flokki skólans, vinnustaðir með 10-29 starfsmenn, og endaði skólinn í 72. sæti. Er það heldur lakari árangur en áður en það er nú ekki aðalatriðið heldur það að gera fólk meðvitað um gildi hreyfingar fyrir líkama og sál. Fjölbreytnin var mikil í vali á hreyfingu okkar starfsfólks því alls voru skráðar 26 mismunandi tegundir hreyfingar. Ganga var mest stunduð síðan líkamsrækt og crossfit og þá skíði og jóga. Meðal annarra hreyfitegunda má nefna dans, hjól, hlaup, hnefaleika, skauta, sleðaferðir og sund. Allt svo hressandi og skemmtilegt!

Snjórinn hefur glatt okkur hér norðanlands að undanförnu. Tilkoma hans hefur hleypt lífi í skíðabrekkurnar þar sem iðkendur skíðaíþrótta hafa þeyst niður brekkurnar og brunað eftir gönguskíðabrautum síðustu vikur. Nemendaráð kom með þá hugmynd til skólastjórnenda að nýta tækifærið og hafa skíðadag fyrir nemendur. Stjórnendur tóku vel í hugmyndina og sáu til þess að nemendur hefðu aðgang að skíðasvæðinu í Tindaöxl á Ólafsfirði og þann búnað sem til þyrfti. Eftir hádegi í gær fjölmenntu nemendur í Tindaöxl og áttu þar frábærar stundir. Sumir voru að stíga á skíði í fyrsta sinn og fengu leiðsögn frá íþróttakennurum um hvernig best væri að bera sig að en aðrir þaulvanir úr skíðabrekkunum í Fjallabyggð. Sumir voru á snjóbrettum, aðrir prufuðu gönguskíðin en flestir voru á svigskíðum. En hverju nafni sem græjurnar kallast þá skemmtu sér allir vel og veður og aðstæður voru með besta móti eins og myndirnar bera með sér.