Fréttir

Val í miðannarviku

Staðnemar geta valið úr spennandi áföngum í miðannarvikunni. Einn hefur titilinn „hugsað út fyrir kassann“ og er ætlaður hugmyndaríku fólki og þeim sem hafa áhuga á hönnun. Verkefni verða unnin í nokkrum forritum og síðan búin til heimasíða þar sem þeim verður safnað saman. Leiðbeinandi verður Lilja Hauksdóttir. „Hreyfing, hamingja og gleði“ er lýstandi titill á öðrum áfanga. Kennari þar er Örn Elí Gunnlaugsson, íþróttafræðingur. Áfanginn er sérsniðinn fyrir starfsbraut en aðrir nemendur geta óskað eftir á fá að vera með. Í þriðja lagi gefst áhugafólki um tölvuleiki kostur á svokallaðri MEGA-viku. Þar verður fjallað um rafíþróttir og keppt á einu slíku íþróttamóti. Ýmsir hreyfitölvuleikir verða prófaðir og nemendur fá tækifæri til að læra með leik á sviði vísinda og verkfræði. Leiðbeinandi er Sæmundur Ámundason. Þá er ótalið að nemendur sem komnir eru nokkuð áleiðis í námi eiga kost á að aðstoða við ráðstefnuhald í miðannarvikunni en þá fer fram alþjóðlega ráðstefnan Global Education in a Rural Environment sem MTR heldur í Ólafsfirði dagana 15.-19. október. Sjá hér: https://www.mtr.is/ecomedia
Lesa meira

Skólafundur

Staðnemar ræddu hugmyndir sínar og áherslur varðandi skipulag og inntak náms og skólastarfs, félagslífs og fleira í morgun. Þetta var hópastarf og ekki stýrt hverjir hópuðu sig saman að öðru leyti en því að óskað var eftir að í hópar væru ekki einkynja og þar væri blanda af nýnemum og lengra komnum. Hópar völdu sér sjálfir ritara. Nokkrum útgangspunktum fyrir umræðu í hópunum var varpað á tjald í Hrafnavogum. Unnið verður úr ábendingum og tillögum hópanna og reynt að koma til móts við það sem þar kemur fram við ákvarðanir sem teknar verða á næstunni um námsframboð á næstu önn og annað sem við á.
Lesa meira

Endurvinnsla á Tenerife

Hópur sjö MTR-nema og eins kennara dvelur þessa viku á Tenerife og tekur þátt í Erasmus+ verkefninu HELP sem snýst meðal annars um endurvinnslu. Jafn stórir hópar ungmenna frá Litháen og Noregi taka þátt í verkefninu auk hóps heimamanna á Tenerife. Í fyrri áföngum þess var fjallað um vistvænar afurðir og um mengun.
Lesa meira

Móttaka á Bessastöðum

Heimsókn nema frá Tías á Lanzarote og PT skólanum á Ítalíu til okkar á Tröllaskaga tókst sérlega vel þótt veðurguðirnir hjálpuðu ekki beinlínis til. Heimsókninni lauk með boði hjá Guðna Th. Jóhannessyni forseta Íslands á Bessastöðum í gær. Fulltrúar ítölsku og spænsku nemendanna færðu honum gjafir. Hann sagði eitt það besta við að gegna þessu embætti að fá að taka á móti gestum víða að og njóta samveru við þá.
Lesa meira

Myndlist í september

Ákveðnir veggir í Hrafnavogum, nýjum og glæsilegum sal skólans, eru fráteknir fyrir listaverk sem skipt er um mánaðarlega. Oftast er einstökum listamönnum af nærsvæði skólans boðið að sýna þar verk sín en í þessum mánuði voru verkin sótt í listaverkasafn Fjallabyggðar. Yfirskriftin er: „Afstrakt eða Abstrakt“ - en sýningin er helguð óhlutbundnum verkum. Hún samanstendur af fimm verkum úr höfðinglegri gjöf hjónanna Arngríms Ingimundarsonar og Bergþóru Jóelsdóttur til Siglufjarðarkaupstaðar árið 1980. Með henni vildu hjónin sýna Siglfirðingum þakklæti fyrir stuðning þeirra við foreldra Arngríms eftir að þau brugðu búi í Fljótunum vegna heilsubrests og fluttust til Siglufjarðar. Í heild gáfu Arngrímur og Bergþóra Siglufjarðarkaupstað 127 verk eftir marga af frestu listmálurum þjóðarinnar á tuttugustu öld. Er þessi einstaka gjöf grunnurinn að listaverkasafni Fjallabyggðar í dag. Verkin sem til sýnis eru í Hrafnavogum núna eru, auk þess að auðga tilveru fólks í skólanum, notuð sem námsefni í grunnáfanga í myndlist. Óhlutbundin verk eru einmitt til umfjöllunar þar þessar vikurnar og á myndinni sem fylgir fréttinni má sjá Bergþór Morthens myndlistarkennara ræða um verkin á sýningunni við nemendur.
Lesa meira

Suðrænir gestir

Hópur framhaldsskólanema frá Tías á Lanzarote og PT skólanum á Ítalíu eru gestir nemenda MTR næstu sjö daga. Skólarnir eru í samstarfsverkefni um valdeflingu og sjálfbærni. Það eflir nemendur dreifðra byggða í því að finna leiðir til að takast á við framtíðina í hörðum heimi. Gestirnir eru 28, tuttugu og þrír nemendur og fimm kennarar. Í móttökunefndinni eru 20 nemendur og þrír kennarar.
Lesa meira

Kosning í nemendaráð

Rafrænni kosningu í nemendaráð Trölla, nemendafélags MTR lauk kl. 12:00 föstudaginn 14. september sl. Kosningaþátttaka var 43,5% og féllu atkvæði þannig:
Lesa meira

Fjör á nýnemadegi í MTR

Gleðin var við völd á miðvikudag þegar nýir nemar voru boðnir sérstaklega velkomnir í skólann. Með heimamönnum glöddust gestir frá Grunnskóla Dalvíkur og Grunnskóla Fjallabyggðar. Keppt var í sápubolta við mikinn fögnuð viðstaddra. Margir sýndu góða takta á vellinum og áhorfendur nutu tilþrifanna. Innanhúss reyndi fólk sýndarveruleika og skoðaði ýmis tæki í eigu skólans. Veitingar Bjargar runnu ljúflega niður að venju. En myndir Gísla segja meira en mörg orð.
Lesa meira

Nemendaráðskosning

Ellefu nemendur keppa um sæti í nemendaráði Trölla, félags nemenda í skólanum. Kosningin er rafræn. Hún hófst í morgun miðvikudag kl. 10:00 og stendur til föstudags 14. september kl. 12:00. Frambjóðendur kynna sig og áhersluatriði sín í félagslífi skólans á flettiskjá í Hrafnavogum. Það eru fimm sæti í nemendaráðinu sem þessir ellefu nemendur keppa um. Sú eða sá sem hlýtur flest atkvæði verður formaður. Á kjörskrá eru staðnemar og nemar með frjálsa mætingu.
Lesa meira

Nýnemadagur miðvikudaginn 12. september 2018

Hefðbundin kennsla fellur niður eftir kl. 10:30 miðvikudaginn 12. september þegar við gerum okkur dagamun til að bjóða nýnema skólans velkomna. Góðir gestir koma í heimsókn og líf og fjör verður vonandi bæði úti og inni. Á nýnemadeginum verður keppt í sápubolta (ef veður leyfir), hægt verður að fara í sund og prófa ýmislegt innahúss. Tölvuklúbburinn kynnir starfsemi sína og nemendur MTR hafa tækifæri til að kynnast stefnumálum þeirra sem bjóða sig fram til setu í nemendaráði Nemendafélagsins Trölla. Í kjölfarið hefst svo rafræn kosning í nemendaráðið fyrir nemendur MTR. Að sjálfsögðu verða veglegar veitingar að hætti Bjargar
Lesa meira