Fréttir

Á skóladagatali hvers árs eru fjórir dagar sérstaklega merktir endurmenntun kennara, tveir í upphafi skólaársins og aðrir tveir í lok þess, en auk þess sinnir starfsfólk skólans ýmiskonar endurmenntun árið um kring. Á þessum tveimur dögum í lok síðustu skólaára hefur fjölbreytt endurmenntun verið á dagskrá t.d. ýmis námskeið og fyrirlestrar auk skólaheimsókna innanlands- sem utan. Að þessu sinni var ekki leitað langt yfir skammt því skipulagðar voru heimsóknir til okkar góðu granna í Suður-Þingeyjarsýslu; Framhaldsskólann á Húsavík og Framhaldsskólann á Laugum. Á báðum stöðum fengum við höfðinglegar móttökur jafnt starfsfólks sem stjórnenda. Fengum kynningu á skipulagi náms í hvorum skóla, skoðuðum húsakynni og aðstöðu og svo var rætt í minni hópum um stakar kennslugreinar, tækifæri og áskoranir. Margt áhugavert bar á góma og er ekki ósennilegt að áhrifa heimsóknanna gæti þegar skólinn fer aftur af stað næsta haust. Gist var í góðu yfirlæti að Narfastöðum í Reykjadal og eins gafst starfsmannahópnum tími til að skoða sig aðeins um á Húsavík. Var þetta góður endir á samveru vetrarins.

Það var hátíðleg stund í Menntaskólanum á Tröllaskaga í gær þegar þrítugasta brautskráning skólans fór fram. Fimmtíu og tveir nemendur brautskráðust, eru það jafn margir og á vorönn í fyrra og eru það fjölmennustu útskriftarhóparnir frá upphafi. Alls hafa nú 678 nemandur brautskráðst frá skólanum á þeim fimmtán árum sem hann hefur starfað. Útskriftarnemarnir að þessu sinni koma frá þrettán stöðum á landinu og tveir eru búsettir erlendis, enda mikill meirihluti nemenda skólans fjarnemar. Fjórtán útskriftarnemar sáu sér fært að mæta í athöfnina en aðrir fylgdust með í streymi.  Jóna Vilhelmína Héðinsdóttir aðstoðarskólameistari stýrði athöfninni og flutti ávarp þar sem hún sagði frá starfi skólans. Í máli hennar kom m.a. fram að á þessari önn voru rúmlega 550 nemendur skráðir í nám. Um 90% þeirra fjarnemar og stór hluti af höfuðborgarsvæðinu. Kjörnámsbraut var fjölmennasta brautin og þar á eftir félags- og hugvísindabraut. Starfsmenn voru 29. Erlend verkefni voru sem fyrr áberandi í skólastarfinu og hefur fengist fjöldi styrkja til þeirra. Erasmus-styrkir eru fastur liður í skólastarfinu og hafa gert bæði nemendum og kennurum kleift að fara í ferðir til útlanda sem og að taka á móti nemendahópum erlendis frá. Á þessari önn heimsóttu nemendur m.a. samstarfsskóla í Lettlandi og endurguldu þar heimsókn nemenda þaðan á haustönn. Einnig er MTR UNESCO-skóli sem fléttar heimsmarkmið Sameinuðu þjóðanna inn í allt skólastarf þar sem m.a. er lögð áhersla á mannréttindi, umhverfismál og frið. Þakkaði hún að lokum útskriftarnemum fyrir þann tíma sem þeir hafa varið í Menntaskólanum á Tröllaskaga og óskaði þeim velfarnaðar í öllu því sem þeir taka sér fyrir hendur í framtíðinni. Skólameistarinn Lára Stefánsdóttir flutti einnig ávarp þar sem hún óskaði útskriftarnemum allra heilla og þakkaði þeim fyrir að velja MTR. Lagði hún út frá einkunnarorðum skólans: Frumkvæði - Sköpun - Áræði og sagði að þau lituðu allt skólastarfið bæði hjá nemendum og starfsfólki. Mikilvægt væri nemendum að finna eigin rödd, rækta sína styrkleika, vera gerendur í sínu námi en ekki þrælar þess og átta sig betur á hver þau eru. Það muni hjálpa nemendum að þekkja sig sjálf og vera öruggari í eigin skinni. Með því getur maður frekar notað orku sína í að búa til skemmtilegt og innihaldsríkt líf í stað þess að vera að þóknast öðrum og gera það sem maður heldur að maður eigi að vera að gera. Einnig ræddi hún um þann sjálfsaga sem þarf til að vera fjarnemi og þá áherslu sem starfsfólk skólans legði á að allir nemendur nytu sömu þjónustu og nærgætni, hvort sem þeir væru fjarnemar eða staðnemar, án þess að slakað væri á námskröfum. Að lokum gerði hún að umtalsefni orð ráðherra á dögunum um draugabæinn Ólafsfjörð og í hennar augum væri í raun búið að stéttaskipta byggðunum á landinu án þess að fólk vissi um hvað það væri að tala. Á Ólafsfirði væri mikið um að vera þar eru um 40 fyrirtæki, ýmiskonar uppbygging í gangi og öflugt félagslíf. Íbúar hefðu fundið leiðir til að mæta nýjum veruleika og breytingum á atvinnuháttum með elju og dugnaði. Þá var komið að afhendingu prófskírteina, sem Lára skólameistari og Jóna Vilhelmína aðstoðarskólameistari sáu um. Dúx skólans að þessu sinni var Urður Harðardóttir, úr Reykjanesbæ. Hún útskrifaðist af Félags- og hugvísindabraut og hlaut viðurkenningar fyrir framúrskarandi námsárangur í fjórum námsgreinum.   Að lokum var komið að ávarpi nýstúdents sem Helgi Þór Ívarsson, fjarnemi við skólann, flutti. Hann hóf mál sitt á að segja frá því að hann væri að stíga í fyrsta sinn inn í skólabygginguna og að flytja sína fyrstu ræðu. Hann sagði frá þeim áskorunum sem fylgja því að stunda fjarnám því það hefði verið erfiðara en hann bjóst við; að halda einbeitingu og sjálfsaga og vinna jafnt og þétt, það var ekkert auðvelt en með góðri aðstoð og hvatningu sinna nánustu og kennarana hafi það tekist. Eftir grunnskólagönguna hefur hann elt íshokkídraum sinn og hefur leikið þá íþrótt með liðum í Evrópu, hér heima og fyrir landslið Ísland. Fjarnámið hefur gert honum kleift að fylgja þessum draumi eftir, ferðast víða um heiminn til að keppa og mennta sig í leiðinni. Mælti hann með skólanum fyrir alla sem vildu upplifa ævintýri og mennta sig á sama tíma. Þakkaði hann sérstaklega Birgittu Sigurðardóttur, umsjónarkennara fjarnema, fyrir aðstoðina við að skipuleggja námið í kringum allt sem hann hefur áhuga á og benda honum á áfanga sem hann hélt að ekki væri möguleiki á að taka í menntaskóla eins og ýmiskonar íþrótta- og listaáfanga.     Við athöfnina söng Sigurlaug Sturludóttir, ung og efnileg söngkona úr Ólafsfirði, tvö lög við undirleik Ave Kara Sillaots.

Það er bara svona; síðasti kennsludagur annarinnar í dag og nemendur ganga brosandi út í sumarið. Veðurblíðan hefur leikið við okkur að undanförnu svo síðustu kennsludagarnir voru litaðir mikill útiveru og fjöri. Blaknet var sett upp á lóð skólans og var það mikið notað, bæði af nemendum og kennurum og ýmsir spreyttu sig í frisbígolfi en aðstaða til að stunda þá skemmtilegu íþrótt var útbúin við skólann fyrir nokkrum árum. Einnig var skellt í hinn árlega Tarzan-leik í skólalok. Sumir létu þó góðviðrið ekki trufla sig við námið og stunduðu það af kappi hvort sem var innandyra sem utan. Sólin er þó ekki besti vinur tölvuskjánna og var ýmsum brögðum beitt til að geta stundað nám og yfirferð verkefna auk þess að njóta sólarinnar. Framundan er svo Vorsýning skólans, laugardaginn 17. maí, þar sem til sýnis er afrakstur vinnu annarinnar. Næsta vika er helguð námsmati hjá kennurum og föstudaginn 23. maí munu um 50 nemendur setja upp hvíta kollinn þegar útskrift fer fram á sal skólans.

Í síðustu viku voru nemendur og kennarar frá hinum danska Ungdomshøjskolen ved Ribe í heimsókn á Norðurlandi og glöddu m.a. okkur í Menntaskólanum á Tröllaskaga með nærveru sinni. Hópurinn, sem samanstóð af nemendum víða að úr heiminum, kom til landsins á mánudeginum og keyrði beint til Akureyrar þar sem var gist meðan á dvölinni stóð. Á þriðjudegi kom hópurinn í MTR og dagskráin hófst með því að nemendaráð sagði gestunum frá skólanum og skipulagi námsins og gestirnir kynntu í kjölfarið sinn skóla og tóku svo lagið. Þá tók við áhugaverð athöfn þar sem Sigurður Mar Svínfellingagoði, og kennari í MTR, hélt blót að heiðnum sið á túninu við skólann og bauð gestina velkomna. Að henni lokinni sýndu hinir erlendu gestir dans og fengu svo nemendur og kennara MTR með sér í fjörugan línudans áður en sest var að snæðingi. Eftir hádegið skoðaði hópurinn sig um á Ólafsfirði í blíðviðrinu og síðan var brunað á Mývatn til að upplifa þau náttúruundur sem þar eru. Á miðvikudeginum var haldið til Siglufjarðar þar sem var rölt um bæinn og veitinga notið í bakaríinu áður en haldið var í Ljóðasetur Íslands, sem annar kennari í MTR, Þórarinn Hannesson, veitir forstöðu. Þar fengu gestirnir fræðslu um íslenska ljóðlist, sérstaklega Eddukvæðin, sem og fornsögurnar og íslenskar þjóðsögur og tengsl Tolkiens og fleiri rithöfunda við þennan arf okkar. Fræðslan var krydduð með söng, gítarspili og kveðskap og í lok heimsóknar stigu tveir nemendur á stokk og fluttu frumsamin ljóð. Seinni part dagsins var komið saman í hinni nýju menningarmiðstöð Brimsölum í Ólafsfirði, sem enn einn kennarinn úr MTR, Ida Semey, rekur. Þar voru sagðar sögur, flutt tónlist og rætt um heima og geima áður en haldið var til Akureyrar í háttinn. Á fimmtudagsmorgni var enn komið í Ólafsfjörð og nú var farið í fjöruhreinsun og svo búin til listaverk úr einhverju af því sem fannst í fjörunni. Eftir hádegið var úrvinnsla ferðarinnar sett í myndbandsbúning og svo skellti hópurinn sér í sund á Ólafsfirði áður en lagt var í hann til Keflavíkur. Flaug hópurinn utan á föstudagsmorgni eftir viðburðaríka daga á Íslandi. Við þökkum þeim fyrir samveruna og kryddið í tilveruna hjá okkur.

Nú er undirbúningur fyrir vorsýningu nemenda skólans í fullum gangi þar sem til sýnis verður afrakstur af vinnu nemenda á vorönn undir einkunnarorðum skólans; frumkvæði - sköpun - áræði. Verk frá nemendum streyma í skólann og er verið að finna þeim stað í sal og á göngum. Einnig verða rafrænar sýningar á vef skólans. Á sýningunni í skólahúsinu eru fjölbreytt verk nemenda í myndlist, ljósmyndun og fleiri námsgreinum og rafrænar sýningar eru á verkum sem unnin voru í ýmsum greinum sem og í erlendum verkefnum.

Í gærkvöldi fór árshátíð nemendafélagsins Trölla fram þar sem nemendur og kennarar komu saman á sal skólans og áttu góða samveru. Nemendaráð sá að venju um undirbúning og var mikið líf og fjör í skólanum í gær þegar hann stóð sem hæst. Framkvæmdin gekk svo að óskum og allir skemmtu sér vel. Boðið var upp á veitingar að hætti unga fólksins s.s. sushi, pizzur og kebab og runnu þær ljúflega niður. Síðan voru heilasellurnar virkjaðar í spurningakeppnum af ýmsu tagi í blönduðum liðum nemenda og kennara og verðlaun afhent að lokinni spennandi keppni. Ýmislegt fleira var til gamans gert og ekki mátti gleyma að stilla sér upp fyrir framan myndavélina í góðra vina hópi.

Það er orðinn fastur liður að fulltrúi frá stéttarfélaginu Einingu Iðju heimsæki skólann á vordögum til að kynna nemendum gildi þess að vera í stéttarfélögum og til að fara yfir réttindi þeirra og skyldur á vinnumarkaði. Í þetta sinn var það Rut Pétursdóttir, mannauðs- og fræðslustjóri félagsins, sem sá um kynninguna. Voru nemendur áhugasamir og spurðu út í eitt og annað enda margir þeirra í vinnu með skóla og svo eru sumarstörfin á næsta leiti. Á heimasíðu Einingar Iðju kemur fram að starfsmenn félagsins hafa tekið eftir mikilli breytingu til batnaðar varðandi meðvitund unga fólksins í þessum málum. Það veit betur hvar það á að spyrjast fyrir um réttindi sín og eins vita ungmenni mun betur en áður hverju þau eiga rétt á. Skólakynningar sem þessar eiga eflaust þátt í þessari ánægjulegu þróun.

Það var gestkvæmt hjá okkur síðustu vikuna fyrir páskafrí. Meðal þeirra sem heimsóttu okkur voru fjórir franskir kennarar, frá sveitarfélaginu Lesquin nyrst í Frakklandi, sem voru hér í skólanum í fjóra daga til að fylgjast með kennslu og kynna sér skólastarfið. Fengu þeir kynningu á kennslufyrirkomulagi skólans, sátu kennslustundir og áttu viðtöl við nemendur, kennara og skólastjórnendur. Var ýmislegt með öðrum hætti en þeir áttu að venjast. Í lok heimsóknarinnar voru þeir beðnir um að nefna orð sem lýstu upplifun þeirra af skólanum og þetta var þeirra niðurstaða: Frelsi, virðing, hljóðlátt, vellíðan, áhugavert, forvitnilegt og nýstárlegt.

Í gær röltu nemendur 10. bekkjar Grunnskóla Fjallabyggðar vegspottann á milli skólanna og litu í heimsókn til að kynna sér skólastarfið í MTR. Þeir munu taka næstu skref á námsferlinum næsta haust og því upplagt að kynna sér vel hvað er í boði. Var þeim skipt í nokkra hópa sem fóru á milli stöðva til að fræðast um skólann og leysa ýmis verkefni. Nemendaráð og kennarar skólans sögðu frá námsskipulaginu, erlendum samstarfsverkefnum, félagslífinu og hinum afslappaða skólabrag sem einkennir MTR og gestirnir tóku auk þess þátt í klippimyndagerð og létu reyna á hæfni sína í rafíþróttastofunni. Þetta var líflegur og áhugasamur hópur sem tók virkan þátt og spurði margs. Sumir hafa þegar valið sér skóla til að halda áfram námi í en aðrir eru enn að velta vöngum. Heimsókn sem þessi hjálpar til við ákvarðanatökuna. Í lok hennar var boðið upp á pizzur sem runnu ljúflega niður.

Síðastliðið haust hóf skólinn þátttöku í NordPlus-verkefni sem miðar að því að bæta félagslega sjálfbærni meðal drengja og draga úr brottfalli þeirra úr framhaldsskóla. Verkefnið er unnið í samstarfi við tvo framhaldsskóla í Danmörku og einn á Grænlandi þar sem lögð er áhersla á að kanna ástæður fyrir lakari námsárangri drengja og hugað að mögulegum lausnum. Fyrir hönd MTR taka þau Guðbjörn Hólm Veigarsson, Ida Semey og Hólmar Hákon Óðinsson þátt í verkefninu.Hugmyndir hópsins beinast meðal annars að áhrifum samfélagsmiðla á athygli drengja, kynjaðri væntingu um hegðun og árangur og stöðluðum hugmyndum um karlmennsku sem gætu haft neikvæð áhrif á námsárangur. Með verkefninu á m.a. að kanna hvort drengir upplifi skort á stuðningi vegna staðalímynda um karlmennsku, þar sem það gæti verið litið á það sem veikleika að biðja um aðstoð og viðurkenna að maður geti ekki reddað hlutunum sjálfur. Þátttakendur hófu verkefnið snemma sl. haust með heimsókn í GUX Nuuk framhaldsskólann á Grænlandi og í framhaldi af því var komið saman í Christianshavn gymnasium og Örestad gymnasium í Kaupmannahöfn. Í þessari viku er lokahnykkurinn og er hópurinn staddur hjá okkur í MTR til að kynna sér starfshætti og skoða hvort eitthvað í kennslumódeli skólans (Tröllaskagamódelið) gagnist verkefninu. Næstu vikur verða svo nýttar í að vinna úr upplýsingum sem safnað hefur verið í þessum heimsóknum og komið hafa fram í könnunum og viðtölum tengdum verkefninu. Munum við segja frá úrvinnslu og niðurstöðum þegar þar að kemur. Í hópnum sem heimsótti okkur voru átta kennarar sem starfa í Danmörku og einn sem starfar á Grænlandi. Hafði hópurinn heyrt eitt og annað um skólann, frá fulltrúum okkar í verkefninu, og var ekki að kaupa allt sem þar kom fram en í heimsókninni sáu hinir erlendu gestir að þar var ekki farið með neinar ýkjur. Það sem kom þeim mest á óvart var sú ábyrgð sem nemendur í skólanum taka á eigin námi, hversu andrúmsloftið í skólanum var afslappað og þægilegt, hversu mikið frelsi nemendur hafa til að sinna náminu eftir sínu höfði og með hvað fjölbreyttum hætti nemendur geta unnið verkefni sín þar sem styrkleikar þeirra njóta sín. Gestirnir hlýddu á kynningar frá bæði nemendum og kennurum og voru þeir sérstaklega heillaðir af innihaldsríkri og upplýsandi kynningu frá nemendaráði. Gestirnir áttu einnig viðtöl við nemendur, kennara og skólastjórnendur og það kom þeim skemmtilega á óvart hversu mikill samhljómur var með öllum þeim sem rætt var við. Allir innan skólasamfélagsins höfðu sömu sögu að segja af ágæti námsskipulagsins, höfðu sömu upplifunina af skólabragnum og þótti vænt um skólann sinn. Var heimsókn þessi hin ánægjulegasta og alltaf er gott að fá að spegla sig í augum annarra.