Fréttir

Það var mikið um að vera í skólanum síðustu kennsludaga annarinnar. Nemendur kepptust við að ljúka síðustu verkefnum og listastofan var þéttsetin þar sem nemendur lögðu lokahönd á ýmis verk fyrir sýninguna. Póstbíllinn kom ófáar ferðirnar með sendingar frá fjarnemum og sýningarstjórinn Bergþór Morthens var í óðaönnum að koma verkunum haganlega fyrir með aðstoð starfsfólks skólans. Sýningin opnaði í dag, laugardag, og var vel sótt. Á henni má sjá fjölbreytt verk; ljósmyndir og málverk nemanda af listabraut sem og skapandi verkefni nemanda af öðrum brautum. Einkunnarorð skólans: Frumkvæði - Sköpun - Áræði hafa verið í hávegum höfð við vinnu þessara verkefna. Valin verkefni úr ensku, íslensku og erlendum samstarfsverkefnum eru einnig til sýnis á heimasíðu skólans. Ungum sýningargestum var boðið að fást við jólaföndur og veitingar voru í boði fyrir alla aldurshópa. Sýningin verður opin til 19. desember á starfstíma skólans og er fólk hvatt til að líta inn og skoða afrakstur vinnu nemenda á haustönninni.

Hér er tengill í stafræna sýningu skólans.

Menntaskólinn á Tröllaskaga er opin prófstöð háskólanna. Undanfarna daga hafa háskólanemar fjölmennt í skólann til að þreyta próf og sparað sér þannig fé, tíma og þá fyrirhöfn sem fylgir því að taka prófin í þeim skóla þar sem þeir stunda nám. Aðallega eru þetta nemar við Háskólann á Akureyri og uppistaða þeirra eru útskrifaðir stúdentar frá MTR sem búsettir eru í Fjallabyggð. Sú staðreynd sýnir mikilvægi þess að hafa framhaldsskóla í byggðarlaginu því sýnt hefur verið fram á að þegar svo háttar aukast líkurnar á að ungt fólk setjist að í sinni heimabyggð. Háskólanemar þeir sem hér taka próf stunda nám á ýmsum sviðum, flestir eru í hjúkrunarfræði en næst þar á eftir koma kennslu- og lögreglufræði. Undanfarnir dagar hafa því einkennst af ánægjulegum endurfundum og hver veit nema einhverjir þessara nema bætist í starfsmannahópinn í MTR í framtíðinni.

Í gærkvöldi hélt nemendafélagið Trölli sitt árlega Jólakvöld en það er einn af hápunktunum í félagslífinu í skólanum ár hvert. Staðnemar og hluti starfsmannahópsins mætti þar til veglegrar matarveislu í sal skólans og að henni lokinni voru heilasellurnar virkjaðar í spurningaleikjum. Boðið var upp á þrírétta matseðil; grafinn og reyktan lax, pate og tvíreykt hangikjöt í forrétt, hamborgarhrygg og kalkúnabringu með tilheyrandi meðlæti í aðalrétt og svo ísrétt til að toppa sæluna. Salurinn var skreyttur jólaljósum og jólalögin ómuðu.

Innritun í fjarnám á vorönn er lokið. Aðsókn var gríðarleg en því miður er ekki hægt að taka við fleiri nemendum, þar sem fjárveiting til skólans stendur ekki undir meiru. Innritun fyrir haustönn opnar 1. apríl.

Í dag komu nemendur úr 8. - 10. bekk Grunnskóla Fjallabyggðar í skólann til að setja saman ljóð. Tilefnið var hin árlega ljóðasamkeppni þessara bekkja sem er liður í ljóðahátíðinni Haustglæður sem haldin hefur verið í Fjallabyggð allt frá árinu 2007. Hátíðin er samstarfsverkefni Ljóðaseturs Íslands og Ungmennafélagsins Glóa en Grunnskóli Fjallabyggðar og Menntaskólinn á Tröllaskaga eru meðal þeirra aðila sem taka þátt í framkvæmdinni. Nemendur nota listaverk sem kveikjur að ljóðum og að þessu sinni voru það verk eftir starfsfólk skólans, núverandi og fyrrverandi nemendur hans og verk úr safni skólans. Nemendur fengu góð ráð í ljóðasmíðinni frá Þórarni Hannessyni, kennara í MTR og forstöðumanni Ljóðaseturs Íslands, áður en leitað var innblásturs frá listaverkunum. Misjafnlega gekk að koma orðum á blað, eins og gengur og gerist, en uppskeran var engu að síður góð; um áttatíu ný ljóð. Nú bíður það fimm manna dómnefndar að vega og meta afurðirnar og höfundar bestu ljóðanna verða svo verðlaunaðir. Úrslit verða kunngjörð á Ljóðasetri Íslands á Siglufirði síðar í desember. Það er mikils virði fyrir skólann að fá ungmenni úr grunnskóla byggðarlagsins í heimsókn. Með því fá þau að kynnast andrúmsloftinu í skólanum sem eykur líkurnar á að þau sækist eftir skólavist þegar þar að kemur.

25. nóvember er Alþjóðlegur baráttudagur gegn kynbundnu ofbeldi. Kynbundið ofbeldi viðgengst þegar enginn talar um það og þótt unnið hafi verið gott starf til að stemma stigu við því á síðustu árum sýna tölur að enn er langt í land. Fjölmargir UNESCO-skólar halda uppi metnaðarfullu kynjafræðinámi fyrir nemendur sína og er mikilvægur liður í náminu að læra um kynbundið ofbeldi. Félag Sameinuðu þjóðanna og félag kynjafræðikennara tóku höndum saman í tilefni dagsins og hvöttu skóla til þess að standa fyrir fræðslu um kynbundið ofbeldi innan skóla sem og víðar í samfélaginu.

Skuggakosningar fóru fram í dag, 21. nóvember, í 30 framhaldsskólum á landinu m.a. hér í MTR. Sett var upp eftirlíking af kjörstað þar sem nemendur mættu og gerðu grein fyrir sér. Þá fengu þeir afhentan atkvæðaseðil með nöfnum allra þeirra 11 framboða sem bjóða fram í ár. Síðan var farið í kjörklefann og sett x á þann stað sem hver og einn kaus og einnig gátu nemendur merkt við hvort kosningaaldur ætti að miðast við 16 ára eða 18 ára aldur. Seðillinn var síðan settur í kjörkassann. Er þetta í fimmta sinn sem slíkar skuggakosningar eru haldnar hér á landi. Niðurstöðurnar endurspegla vilja nemenda um allt land og verða þær gerðar opinberar eftir að kjörstöðum lokar á kjördag alþingiskosninga, þann 30. nóvember. Spennandi verður að sjá hvort þær verði eitthvað í líkingu við raunveruleg úrslit.

Í dag, þann 20. nóvember, er Alþjóðadagur barna. Þetta er dagurinn þar sem við fögnum og minnum á Barnasáttmála Sameinuðu þjóðanna og þau lögfestu réttindi sem þessi útbreiddasti mannréttindasáttmáli heims tryggir öllum börnum. Barnasáttmálinn var samþykktur á Allsherjarþingi Sameinuðu þjóðanna árið 1989, á Íslandi var hann lögfestur á Alþingi árið 2013. Í tilefni dagsins fá börn og ungmenni um allan heim orðið og láta rödd sína og skoðanir heyrast. Ungmennaráð UNICEF á Íslandi útbjó m.a. myndband með kraftmiklum skilaboðum ungmenna til fullorðinna hér á landi og ráðamanna um allan heim. Barnaheill lét einnig gera myndband þar sem rætt er við börn sem hafa hafa þurft að yfirgefa heimili sín vegna stríðsátaka, loftslagsbreytinga eða náttúruvár og áfallið sem því getur fylgt. Er þar m.a. rætt við börn frá Grindavík sem þurftu að flytja þaðan vegna jarðhræringanna á Reykjanesi. Til að fagna deginum komu nemendur MTR saman í sal skólans og horfðu á myndböndin og síðan var farið í spurningakeppni þar sem spurningarnar snérust um Barnasáttmálann og þau réttindi sem hann á að tryggja börnum um allan heim. Spurningarnar sömdu nemendur í áfanga sem ber titilinn Heimsmarkmið - umhverfi og sjálfbærni þar sem fjallað er um heimsmarkmið Sameinuðu þjóðanna út frá umhverfisvernd, mannréttindum, heilbrigði og félagslegri velferð. Markmið spurninganna var að fá nemendur til að velta fyrir sér mismunandi stöðu barna í heiminum. Hér eru myndböndin tvö.

Opinn dagur var haldinn í Háskólanum á Akureyri sl. miðvikudag. Þar gafst gestum og gangandi tækifæri á að kynna sér úrvalið í grunnnámi skólans. Hátíðarsalnum var breytt í líflegt sýningarsvæði þar sem hver námsleið var með sinn bás. Þar kynntu stúdentar námið og deildu reynslu sinni og upplifun af lífinu í HA og starfsfólk skólans svaraði spurningum um námið. Einnig var boðið upp á skipulagðar gönguferðir um háskólasvæðið þannig að gestir gætu kynnt sér aðstöðuna í skólanum. Nemendur úr framhaldsskólum á Norður- og Austurlandi fjölmenntu á kynninguna í skipulögðum rútuferðum í boði háskólans. Í þeirra hópi voru annars- og þriðjaárs staðnemar úr MTR sem sumir hverjir stefna á frekara nám í HA. Urðu nemendur margs vísari um hvað væri í boði og hvernig námið væri skipulagt. Þótti þeim sérstaklega gaman og gagnlegt að tala við stúdenta sem þekkja námið í HA af eigin raun. Ekki skemmdi svo fyrir að í lok kynningarinnar var boðið til pizzuveislu.