Fréttir

Jólakvöld nemendafélagsins var haldið í skólanum á fimmtudagskvöld. Starfsfólki var einnig boðið til veislu og skemmtunar í skólanum. Kvöldið tókst mjög vel, salurinn var fallega skreyttur, skipulagið gott og samvinna nemenda til fyrirmyndar.

Kennsla í hjartahnoði og meðferð hjartastuðtækis fór fram í hádeginu í dag. Það var Harpa Hlín Jónsdóttir skyndihjálparkennari, björgunarsveitarkona og sjúkraliði sem kom í skólann og leiðbeindi starfsfólki og nemendum í fyrstu hjálp.

Átakið Roðagyllum heiminn hófst í dag í skólanum með mandarínu- og snúðaveislu ásamt sýningu á gagnvirku listaverki eftir Idu Semey, kennara skólans. Átakið stendur í 16 daga og lýkur á mannréttindadegi Sameinuðu þjóðanna 10. desember.

Þorsteinn V. Einarsson kynjafræðingur var með fyrirlestur fyrir nemendur skólans í dag. Þar ræddi hann um rótgrónar karlmennskuhugmyndir sem eru hamlandi fyrir öll kyn og skaðlegar fyrir þróun samfélagsins í átt til jafnræðis milli allra hópa.

Í gær fylltist skólinn af ungum skáldum sem sátu við yrkingar frá morgni og framundir hádegi. Þetta voru nemendur úr 8. - 10. bekk Grunnskóla Fjallabyggðar sem þarna voru að taka þátt í ljóðasamkeppni. Af þessu tilefni var sett upp myndlistarsýning með verkum nemenda MTR og notuðu ungskáldin verkin sem innblástur fyrir ljóðagerðina.

Menntaskólinn á Tröllaskaga varð efstur í flokki lítilla vinnustaða í keppninni Reddum málinu, á vegum Samróms, sem lauk í gær. Fulltrúar skólans tóku við viðurkenningu af því tilefni úr hendi Guðna Th. Jóhannessonar Forseta Íslands á Bessastöðum í dag.

Sjö nemendur ásamt tveimur kennurum eru nú í námsferð í Kalamata í Grikklandi. Þar taka þau þátt í verkefni sem nefnist „Þú hefur líka rödd“ en markmið þess er að þjálfa nemendur í virkri þátttöku í samfélaginu og kenna þeim að axla ábyrgð í lýðræðisþjóðfélagi. Auk Íslendinga og Grikkja taka nemendur frá Tékklandi og Lettlandi þátt í verkefninu.

Fjarvinna og upplýsingatækni eru mikilvægur þáttur í skólastarfi í MTR. Stærstur hluti nemenda eru enda fjarnemar og koma aldrei í skólann og öll samskipti við þá eru á netinu. Kennarar skólans eru einnig búsettir á ýmsum stöðum og sinna kennslu hvar sem þeir eru staddir í heiminum.

Það er gaman að fá gesti í heimsókn og í dag komu átján nemendur í VMA ásamt kennara sínum í heimsókn í skólann. Þetta voru nemendur í útivist og vörðu þau deginum við ýmsa íþróttaiðkun með nemendum MTR. Meðal annars var farið í feluskotbolta og ýmsa aðra leiki í íþróttahúsinu.

Innritun í fjarnám á vorönn hófst í morgun og verður opin fram í desember. 46 áfangar eru í boði á vorönninni en þeir lokast um leið og hámarks nemendafjöldi hefur verið skráður til náms. Þannig getur framboð áfanga minnkað hratt svo það borgar sig að hafa hraðar hendur.