Fréttir

Menntaskólinn á Tröllaskaga varð í öðru sæti í flokki meðalstórra stofnana að þessu sinni. Í fyrsta sæti varð Framhaldsskólinn í Vestmannaeyjum. Þetta er sama röð á þessum tveimur stofnunum og var fyrir tveimur árum en í fyrra var MTR í fyrsta sæti en FV í öðru. Við óskum þeim í Eyjum innilega til hamingju. Fimm stofnanir í þessum flokki hljóta sæmdarheitið Fyrirmyndarstofnanir, Menntaskólinn á Laugarvatni, Samkeppniseftirlitið og Menntaskólinn á Egilsstöðum auk MTR. Meðalstórar teljast þær stofnanir sem hafa 20-49 starfsmenn. MTR hefur fjórum sinnum vermt efsta sætið í þessum flokki og þar með fengið sæmdartitilinn „Stofnun ársins“. „Það ber að þakka stéttarfélaginu Sameyki fyrir að framkvæma þessa könnun sem er ríkisstofnunum mikilvæg þar sem marktækar upplýsingar fást um líðan starfsmanna með ítarlegri könnun. Með því móti gefst eftirsóknarvert tækifæri til að fara vel yfir niðurstöðurnar og ná markvissum umbótum. Góð líðan starfsfólks breytir miklu á vinnustað þar sem einstaklingar eru stóran hluta lífsins. Þegar fólki líður vel næst betri samvinna milli þeirra sem eflir árangur stofunar til að sinna markmiðum sínum..“ sagði Lára Stefánsdóttir skólameistari MTR.

Hvað eru myndasögur og hvernig virka þær sem tjáningarmiðill, var viðfangsefni í einum miðannaráfanganum. Áhersla var lögð á að skilja hvernig sjónræn frásögn er notuð til að segja sögu eða miðla hugmynd. Lefteris Yakoumakis, leiðbeinandi, segir að þetta hafi verið inngangsáfangi með áherslu á aðalatriði. Í æfingaskyni hafi nemendur skrifað stuttar sögur og prófað að miðla þeim á sjónrænan hátt. Það skipti máli hvernig slík frásögn hefjist og hvaða ferli sé síðan fylgt. Æfingarnar hafi miðað að því að skerpa á hæfileikum nemenda til að rita og teikna og leiðbeina um notkun þeirrar tækni við sjónræna miðlun. Þá var rætt um hvað þurfi til að ná árangri í heimi teiknimyndanna og hvernig nýta megi slíka færni í ýmsum atvinnugreinum. Leiðbeinandinn, Lefteris Yakoumakis, er listmálari og myndasöguhöfundur, búsettur á Siglufirði.

Þriðjudaginn 20. október hefst valvika fyrir vorönn 2021. Þá velja allir nemendur skólans sér áfanga fyrir komandi önn. Áfangaframboð má finna á vef skólans þar sem jafnframt eru áfangalýsingar. Auglýsingar frá kennurum vegna áfanga má sjá á Padlet-vegg. Nemendur eru beðnir að hafa samband við umsjónarkennara sína vegna valsins. Mikilvægt er að velja í valvikunni til að tryggja sér pláss í áföngum. Opnað verður fyrir innritun nýrra nemenda 1. nóvember.

Til eru aðferðir við að bæta líf sitt með skipulegum hætti. Nemendur í þessum áfanga hafa þjálfað samskipti, sjálfsaga, slökun og fleira sem gagnast við að ná betri tökum á námi og setja sér markmið fyrir framtíðina. Nemendur lærðu að hrósa og taka við hrósi frá öðrum, um styrkleika, fyrirmyndir, þakklæti og hamingju. Markmiðið er að kynnast sjálfum sér betur, bæta samskipti, auka sjálfstraust og draga úr kvíða. Nemendum finnst áfanginn áhugaverður og gagnlegur. Kennari er Sólveig Helgadóttir, ACC markþjálfi, sem hefur sérhæft sig í að leiðbeina ungu fólki. Vegna faraldursins fór nám í miðannaráföngunum þremur fram á jafn mörgum stöðum. Sólveig og nemendur hennar hafa haft bækistöð í Sandhóli, húsi Rauða krossins í Ólafsfirði.

Fjarkennt verður vikuna 19.-23. október en nemendum er frjálst að mæta í skólann og vinna saman innan ramma sóttvarnareglna. Ákvörðun um vikuna 26.-30. október verður tekin í næstu viku.

Vegna samkomutakmarkana verður fjarnám í MTR vikuna 5.-9. október, nemendur mæta samkvæmt stundaskrá í fjarkennslustofur sínar sem finna má í kennslukerfinu Moodle. Vikuna 12.-16. október er miðannarvika og full mæting í staðnámi frá 08:10 - 15:15 mánudag til föstudags. Skólinn er ekki lokaður og geta nemendur því komið og unnið í skólanum ef þeir svo kjósa.

Mikael Sigurðsson, nemandi á tónlistar- og náttúruvísindabraut MTR, gerði sérlega góða ferð á suðvesturhornið í síðustu viku. Auk þess að vinna Söngkeppni framhaldsskólanna með félögum sínum Herði Inga, Júlíusi og Tryggva tókst Mikael að sjá og mynda flækingsfuglana elrigreip og heiðatittling. Þar með hefur hann náð því marki, yngstur allra, að sjá og mynda 200 flækningsfugla hér á landi. Mikael er aðeins 16 ára. Fuglana sá hann við Garðskaga og fylgja myndir hans af þeim með fréttinni. Það er heiðatittlingur sem var tvöhundraðasti fuglinn. Mikael hvetur fólk sem sér fugl sem það hefur ekki séð áður og gæti verið sjaldséður flækingur að láta sig vita eða tilkynna það á Birding Iceland á Facebook.

Ástarpungunum Júlíusi og Tryggva Þorvaldssonum, Herði Inga Kristjánssyni og Mikael Sigurðssyni var fagnað sérstaklega í skólanum í morgun. Tilefnið er auðvitað glæsilegur sigur þeirra í Söngkeppni framhaldsskólanna á laugardagskvöldið. Flaggað var fyrir köppunum og þeir sýndu verðlaunagripinn við stutta athöfn. Lára Stefánsdóttir skólameistari sagði þar að þeir hefðu frá upphafi vakið athygli í skólanum fyrir öguð vinnubrögð og skarpa sýn á hvað þeir vildu gera. Þeir hefðu verið skapandi í verkefnum sínum og náð árangri. Strákarnir eru allir nemendur á tónlistarbraut en stunda jafnframt nám á öðrum brautum. Lára sagði að fyrir alla í Menntaskólanum á Tröllaskaga væri árangur þeirra í söngkeppninni einstaklega ánægjulegur. Hún þakkaði þeim fyrir það sem þeir hefðu lagt á sig fyrir skólann og sagði að það væri frábært að hafa þá sem nemendur. Hún þakkaði jafnframt Guðmanni Sveinssyni og Katrínu Ýr Óskarsdóttur, kennurum sem aðstoðuðu þá við undirbúninginn fyrir keppnina.

Tryggvi Þorvaldsson, Hörður Ingi Kristjánsson, Júlíus Þorvaldsson og Mikael Sigurðsson eru fulltrúar MTR í Söngkeppni framhaldsskólanna. Þeir leika jafnframt á eigin hljóðfæri, tvo gítara, hljómborð og bassa. Keppnislagið þeirra verður I ́m gona find another you eftir John Mayer. Söngkeppni framhaldsskólanna fer fram í Kópavogi á laugardagskvöld. Keppendur koma fram í sal án áhorfenda vegna heimsfaraldursins. Keppnin verður í beinni útsendingu á RÚV. Hún hefst klukkan 20:00 og stendur í um það bil tvær klukkustundir. Okkar menn eru með þeim síðustu á svið, sem þykir gott í keppni af þessu tagi.

Menntaskólinn fékk grænfánan afhentan í morgun. Katrín Magnúsdóttir, sem stýrir grænfánaverkefninu hjá Landvernd afhenti fánann, í fyrsta sinn með rafrænum hætti. Grænfánaverkefnið er alþjóðlegt og taka skólar í sextíu og átta löndum þátt í því. Það snýst um að breyta heiminum til hins betra. Menn eru hluti náttúrunnar og þurfa að gæta hennar fyrir komandi kynslóðir. Störf umhverfisnefndar MTR á síðasta skólaári eru forsenda þess að skólinn fær grænfánann nú afhentan. Starfinu verður fram haldið í vetur. Nemendur einstakra áfanga skiptast á um annast umhverfisverkefni í samhengi við námsefni hverju sinni.