Fréttir

Undirbúninngur stendur nú sem hæst fyrir sýningu á verkum nemenda á laugardaginn kemur. Að venju verður fjölbreytt sköpun á önninni gerð sýnileg með ýmsum hætti. Margskonar myndverk verða áberandi en einnig listrænar ljósmyndir, myndbönd og fleira. Aðstaða til sýningarhalds hefur stórbatnað með tilkomu salarins Hrafnavoga og verður spennandi að sjá hvernig sköpunarverk nemenda taka sig út þar. Sýningin verður opnuð kl. 13:00 á laugardag og verður opið til kl. 16:00. Í næstu viku verður sýningin opin á skólatíma.

Í rúman áratug hefur ljóðahátíðin Haustglæður farið fram í Fjallabyggð og er hún samstarfsverkefni Ljóðaseturs Íslands og Ungmennafélagsins Glóa. Ávallt hefur verið lögð áhersla á að virkja börn og ungmenni á þessari hátíð, m.a. hefur ljóðasamkeppni milli nemenda í eldri deild Grunnskóla Fjallabyggðar verið fastur liður í dagkránni. Undanfarin ár hafa listaverk úr listaverkasafni Fjallabyggðar verið notuð sem kveikjur að ljóðum í þessari keppni. Hafa nemendur komið í fundarsal ráðhússins á Siglufirði, virt fyrir sér hin ýmsu listaverk og síðan ort út frá þeim. Þar sem eldri deild GF er nú til húsa í Ólafsfirði þótti upplagt að nemendur kæmu í MTR í þessum erindagjörðum í ár því þar er nóg af listaverkum, bæði í eigu skólans sem og verk nemenda. Nemendur 8. bekkjar riðu á vaðið í vikunni og síðan kom 10. bekkur og loks sá 9. Fengu nemendur smá leiðsögn um ljóðagerð í upphafi en síðan var hafist handa við að yrkja. Gekk það misjafnlega en afraksturinn varð nær 70 ljóð og nú bíður það dómnefndar að velja þrjú þau bestu. Frá upphafi hafa höfundar rúmlega 30 ljóða verið verðlaunaðir og hallar þar töluvert á annað kynið því 26 þessara höfunda eru stúlkur en aðeins sex strákar!

Nemendafélagið Trölli skellti í vöfflur í morgun í tilefni af yfirvofandi jólafríi, eins og formaðurinn komst að orði. Sísvangir nemendur gæddu sér á vöfflunum og höfðu vel af rjóma og sultu með. Piparkökur voru skreyttar með súkkulaði og glassúr og settu hátíðlegan blæ á samverustundina í Hrafnavogum.

Í áfanganum STÆR3TÁ05 fá nemendur innsýn í tölfræði sem mikið er notuð og víða. Í æfingu vikunnar söfnuðu nemendur gögnum, flokkuðu, settu fram tilgátu og notuðu kí-kvaðrat-próf til að meta hana. Meðal annars var kannað hvort vatnsdrykkja, sundferðir og kaup á skyndibita væru mismunandi milli kynja. Sett var fram svokölluð 0-tilgáta, það er að enginn munur væri á kynjum. Nemendur notuðu hentugleikaúrtak og google forms til að flokka og vinna með gögnin. Að endingu var svo skrifuð skýrsla. Niðurstöður bentu til að ekki væri munur vatnsdrykkju kynja og ekki heldur á kaupum á skyndibita. Hins vegar virðast konur duglegri að synda en karlar og væri ástæða til að kanna muninn sem fram kom nánar. Kennari í ályktunartölfræði er Unnur Hafstað.

Aðalfundur Foreldrafélags MTR verður haldinn í skólanum þriðjudaginn 5. desember kl. 17:00. Markmið félagsins er að efla samstarf foreldra um mál sem varða velferð og þroska nemenda og vera vettvangur samstarfs foreldra og forráðamanna nemenda. Einnig að skapa farveg fyrir samskipti við stjórnendur skólans um málefni ólögráða nemenda og styðja heimili og skóla í að búa nemendum góð skilyrði til menntunar.

"Hvað gera nemendur í frímínútum?" var rannsóknarspurning í lítilli vettvangsathugun eins nemandans í sálfræðiáfanganum SÁLF2AA05 í síðustu viku. Niðurstöður benda til þess að liðlega þriðjungur nemenda tali saman í löngu frímínútunum en tæplega fjórðungur læri og álíka hlutfall noti farsímann. Fáeinir voru í tölvunni að gera eitthvað annað en læra, fóru út af skólalóðinni eða fengu sér að borða. Tveir sváfu. Vettvangsathugunin fór fram í löngu frímínútunum, kl. 9:10-9:30 þrjá morgna í síðustu viku.

Nemendur eru beðnir um að meta aðstæður áður en þeir leggja af stað í skóla og hafa samráð við forráðamenn séu þeir undir lögaldri. Skólaakstur frá Dalvík og Siglufirði er ákvarðaður af bifreiðastjórum sem sem bera ábyrgð á akstrinum. Strætó frá Akureyri tekur sínar ákvarðanir. Aki þeir ekki er það tilkynnt á heimasíðu skólans þegar við fáum þær fregnir. Sé talið að veður hamli för eða sé áhættusamt, en skólabifreiðar og Strætó keyra, eru nemendur beðnir að tilkynna það á skrifstofu skólans. Nemendur stunda námið heima þá daga sem ferðaveður er ekki og hafa samband við kennara í Moodle, eða með öðrum hefðbundnum samskiptaaðferðum, gerist þess þörf. Engum skilafrestum er breytt.

Gerð heimildamyndar er meðal verkefna í áfanga um upplýsingatækni dreifnáms. Mynd, hljóð og texti eiga að koma fram í úrlausnunum. Efnisval er frjálst að öðru leyti en því að viðtal eða viðtöl eiga að vera við fólk sem hvorki er í hópi nemenda né starfsmanna skólans. Í fjölbreyttum úrlausnum sem bárust í síðustu viku var meðal annars fjallað um sjómennsku, íþróttir, ferðamannastaði og sögulega atburði. Meðal viðmælenda voru

Fjölþjóðlegur blær var yfir skólanum í síðustu viku þegar þrjátíu danskrir nemar og tveir kennarar þeirra unnu að samstarfsverkefni með MTR-nemum. Brasilískir taktar voru slegnir á fimmtudag þegar dönsku gestirnir og nokkrir heimamenn prófuðu þarlend hljóðfæri í Hrafnavogum. Guito Thomas og Sigrún Kristbjörg Jónsdóttir áttu frumkvæði að þessari glaðlegu uppákomu í Hrafnavogum. Guito er tónlistarkennari við MTR en Sigrún er kennaranemi í tónlist við Listaháskólann. Hún hefur búið í Brasilíu og hefur leikið brasilíska tónlist opinberlega hér heima með Þórði Högnasyni og Ásgeiri Ásgeirssyni. Hún var hér í Fjallabyggð að fylgjast með tónlistarkennslu. Þau Guito ákváðu að grípa dönsku gestina glóðvolga og fá þá til að prófa brasilísku hljóðfærin. Heimamenn voru ekki jafn fúsir að reyna þessa nýbreytni en vissulega tóku nokkrir þátt í uppákomunni.

Markviss stefna Skota í notkun upplýsingatækni í skólastarfi vakti athygli kennara MTR sem sóttu EcoMediaEurope ráðstefnu í Glasgow í síðustu viku. Framtíðarsýn og stefna Skotanna er mótuð í samstarfi skóla og annarra menntastofnana við fulltrúa atvinnulífsins. Margt af því sem fram kom í fyrirlestrum og kynningum þótti MTR-fólki lærdómsríkt. Ekki síst framlag Kenji Lamb, stafræns ráðgjafa sem sagði frá ókeypis öppum og forritum til notkunar við nám og kennslu. Einnig má nefna upplýsingar um gagnagrunna þar sem nálgast má margvíslegt námsefni í forritun. MTR-kennararnir kynntu ýmsa tækni og aðferðir sem notuð eru hér í skólanum. Til dæmis hvernig upplýsingatækni hefur nýst á starfsbraut til að hjálpa nemendum að taka þátt í erlendu samstarfi með öðrum nemendum skólans. Kennari í ferðalandafræði sagði frá þeim áfanga og notkun upplýsingatækni þar. Áheyrendum þótti merkilegt hve frjálsræði er mikið í nýja íslenska framhaldsskólakerfinu til að skipuleggja ólíka áfanga. Til dæmis með svæðisbundnu efni sem höfðar beint til nemenda í ákveðnum skólum. Einnig greindi fjarkennari í listljósmyndun sem býr á Höfn í Hornafirði frá þeirri tækni sem hann notar í sínu starfi. Eins og sjá má af þessari upptalningu voru kynningar MTR-kennara fjölbreyttar og má að lokum geta þess að goðin í hinum forna átrúnaði þjóðarinnar fengu sinn sess. Frá þeim var sagt og síðan greindi kennari í íslensku frá því hvernig upplýsingatækni er notuð til að koma goðafræðinni til nemenda á skapandi hátt.