Fréttir

Talsvert var um hópvinnu á sérstökum vinnudegi s.l. föstudag. Starfsmenn skoðuðu til dæmis ítarlega niðurstöður kannana á líðan nemenda og viðhorfum þeirra til skólans. Sex hópar fjölluðu um þetta efni og skil voru bæði á skriflegu og munnlegu formi. Frábært, jákvætt og uppleið voru meðal orða sem upp komu í munnlegum skilum. Einnig var fjallað um verkefnið „kennarinn á krossgötum“, um sjálfsmat, ytra mat á skólastarfinu og farið yfir stöðu varðandi jafnréttisáætlun og fleiri slík stefnuplögg, enda mikilvægt að skólinn hafi skýra stefnu og framtíðarsýn. Formlegri dagskrá lauk með verklegri tilsögn Lísu í skíðagöngu og er síst ofmælt að almenn gleði var með þann dagskrárlið.

Nemendur í áfanganum ÍSLE2FM05 hafa síðustu þrjár vikur kynnt sér og rannsakað undirstöðuatriði um málsnið, hljóðfræði og mállýskur. Líka hafa þeir skoðað muninn á vönduðu formlegu málfari og óvönduðu óformlegu málfari og þar að auki hvernig formlegt málfar geti verið óvandað og eins að óformlegt málfar geti verið vandað. Eftir kynningu í fyrstu vikunni skiptu nemendur sér í hópa og hófust handa við rannsókn. Sumir fylgdust með málfari í völdum dagskrárliðum í útvarpi eða sjónvarpi en aðrir tóku viðtöl t.d. við afa eða ömmu, börn, ungling í Reykjavík, nýbúa eða kennara. Líka var hægt að skoða rapptexta eða uppistand. Hóparnir settu fram rannsóknartilgátur og prófuðu þær. Afurðum var svo skilað á sameiginlegt svæði nemenda og kennara í áfanganum. Eftir það fór fram jafningjamat og sjálfsmat á kynningunum. Þær voru líflegar og fjölbreyttar og þótti verkefnið bæði skemmtilegt og lærdómsríkt þótt einstaka nemandi lenti í vandræðum með sinn hlut í hópvinnunni. Kennarar í áfanganum eru Kolbrún Halldórsdóttir og Margrét L. Laxdal. Hér er sýnishorn úr áfanganum: Andri, Hafsteinn, Hrannar og Ragnar ræða við Lísebet og Þórarinn. https://www.youtube.com/watch?v=olPhekv0b5A&feature=youtu.be

Staðnemar og starfsmenn MTR fögnuðu tilslökun sóttvarnarreglna og frjálslegri samskiptum í dag. Nemendur nutu fræðslu um kynlíf, kynhneigðir, kynheilbrigði og getnaðarvarnir hjá Ástráði kynfræðslufélagi læknanema við Háskóla Íslands. Tímasetningin var tilviljun og engin bein tengsl á milli tilslökunarinnar og fræðslunnar, sem raunar fór fram á zoom. En nemendur tóku virkan þátt með aðstoð tækninnar og þar sem athöfnin fór fram í hádeginu var pizza í boði.

Þann 24. febrúar breytast sóttvarnareglur í framhaldsskólum og þar með hjá okkur. Í stuttu máli geta 50 verið í sama rými og þurfa nemendur og kennarar að hafa a.m.k. 1 metra fjarlægð sín á milli en annars nota andlitsgrímur. Í göngum og þar sem menn mætast noti allir andlitsgrímur. Á viðburðum tengdum starfi eða félagslífi skólans er hámarksfjöldi 150 manns.

Að venju var Menntaskólinn á Tröllaskaga opinn börnum á öskudaginn en ekki var hljóðkerfi að þessu sinni vegna covid. Nokkrir barnahópar komu samt og sungu um gamla Nóa, sem orðinn er að skíðamanni í Fjallabyggð og tóku fleiri hefðbundna slagara. Nemendafélagið Trölli stóð fyrir búningakeppni og skörtuðu nemendur og starfmenn skrautlegum búningum. Fyrstu verðlaun fyrir búninga nemenda hlaut Jana Sól Ísleifsdóttir í gervi sjóræningja, önnur verðlaun hlaut Amalía Þórarinsdóttir í búnini Amy Winehouse og þriðju verðlaun fékk Ómar Geir Lísuson í gervi einstæðs föður. Ein verðlaun voru veitt í flokki starfsmanna og hlaut Sæbjörg Ágústsdóttir í gervi Tóta trúðs þau. Framan af morgni gengu nemendur um og horfðu gaumgæfilega upp í loftið og inn í horn og skonsur. Þeir voru að leita fjársjóða (nammipoka) sem forysta nemendafélagsins hafði falið á ýmsum stöðum. Verðlaun nemenda fyrir búninga voru einnig í sætara lagi enda gott að hafa eitthvert mótvægi við allan harðfiskinn sem Björg Traustadóttir treður upp á mann og annan á þessum degi í nafni heilsueflandi framhaldsskóla.

Nemendur enskukennarans Anthony M. La Pusata í tungumálaskóla á Sikiley voru gestir í enskuáfanga hjá Tryggva Hrólfssyni í morgun. Anthony leggur sérstaka áherslu á hæfni í samræðum en í enskukennslu á Ítalíu er almennt nokkuð mikil áhersla á málfræði og ritun en minni á samræðuhæfni. Hann og nemendur hans voru í morgun að kynna sér hvernig framhaldsskóli virkar á Íslandi og áherslur í námi og kennslu í MTR, svo sem vendikennslu og leiðsagnarmat án lokaprófa. Ítölsku nemendunum fannst þeir íslensku frjálslegir í fasi og létu í ljósi að þeir gætu vel hugsað sér að flatmaga í sófum á meðan þeir læra eins og gjarnan er gert í MTR. Þeim fannst athyglisvert að rekast á Bergþór Morthens í nærverunni að kenna nemendum portrettmálun frá vinnustofu sinni í Gautaborg í Svíþjóð. Þá vakti athygi að allir nemendur yrðu að taka inngangsáfanga í listum án tillits til þess hvaða braut þeir væru á. Hugmyndin er að nemendurnir á Sikiley og í MTR bæti samræðuhæfni sína á ensku með æfingum síðar í vetur

Nemendur í kvennasögu hafa það verkefni í þessari viku að setja lög flutt eða samin af konum á Spotify lista. Fjöldi laga er þegar kominn inn á listann. Þar kennir margra grasa, allt frá Bríeti til Birgittu Haukdal, Grýlanna og Janis Joplin. Texti á að fylgja þar sem valið er skýrt. Áður hafa nemendur í þessum áfanga m.a. fjallað um kvennafrídaginn 1975 og kvenkyns rithöfunda og kvenpersónur í bókmenntum. Í stjórnmálafræði er fjallað um stefnur þessar vikurnar og núna eru feminisminn og nýfjrálshyggjan á dagskrá. Verkefni í fyrrgreindu stefnunni snúast meðal annars um Kvennalistann og Kvennaframboðin hér á landi á síðustu öld. Birgitta Sigurðardóttir kennir kvennasöguáfangann og þar eru 23 nemendur en Hjördís Finnbogadóttir kennir stjórnmálafræðina og þar eru 53 nemendur.

Námsárangur var venju fremur góður á haustönninni. Meðaleinkunn í öllum fögum var ívið hærri en á síðustu vorönn og þetta er hæsta meðaleinkunn sem nemendur hafa fengið síðan skólinn hóf starfsemi. Allir nýnemarnir sem byrjuðu í haust náðu öllum áföngunum sem þeir voru í, sem verður að teljast mjög jákvæður árangur. Almennt virðast bæði staðnemar og fjarnemar hafa sýnt dugnað og þrautseigju á þessum erfiðu tímum þegar heimsfaraldur hefur truflað allt líf fólks. Vegna skipulags náms og kennslu í MTR var breytingin yfir í fjarnám auðveldari bæði nemendum og kennurum en víða annars staðar. Kennslukannanir í lok haustannar komu mjög vel út, nemendur voru í heildina ánægðir með kennsluna og greindu almennt frá því að líðan þeirra í einstökum áföngum væri góð eða mjög góð. Miðað við ástandið í samfélaginu er full ástæða til að gleðjast yfir þeim upplýsingum sem fram koma í kennslukönnunum.

Enn fjölgar nemendum í MTR. Skráðir í skólann í dag 13. janúar eru 494 nemendur. Það er um 30 nemendum fleira en við upphaf haustannar. Það er samdóma álit kennara að nemendur hafi gengið rösklega til verks í upphafi annarinnar og skil á verkefnum í lok síðustu viku voru mjög góð. Af nemendum skólans eru aðeins 72 staðnemar en 422 fjarnemar búa vítt um land og einhverjir í útlöndum. Síðari helming haustannar var allt nám fjarnám en vorönnin hófst á staðnámi sem gengur vel. Nemendur hafa verið duglegir að tileinka sér reglur um sóttvarnir og engin sérstök vandamál komið upp.

Staðnemar mæta í fjarnám mánudaginn 4. janúar en staðnám frá og með 5. janúar. Nemendur þurfa að panta mat í mötuneyti fyrirfram. Nemendur þurfa að mestu að vera með grímur þegar ekki næst 2ja metra bil í stofum. Grímur verða í skólanum.