Fréttir

Tíðkast hefur um aldir að norrænir menn sigli til Miklagarðs og sæki þangað litskrúðug klæði og aðrar gersemar. Fimm nemendur og tveir kennarar sem nýlega tókust á hendur slíka ferð héldu hinn forna sið í heiðri. Heim komin afhentu þau okkar skærustu Idolstjörnu, Lísebet Hauksdóttur, hljóðnema við hæfi. Hann er þráðlaus, búinn ýmsum töfrum og skreyttur gimsteinum. Litbrigðin eru frá bleiku yfir í purpura og hæfa litatónum búninga stjörnunnar.

Mánudaginn 29. april 2019 verður fíkniefnafræðsla í Tjarnarborg. Fræðslufundurinn hefst kl. 19:30. Fræðslan er í samvinnu við Lögregluna á Norðurlandi eystra, Grunnskóla Fjallabyggðar og Menntaskólann á Tröllaskaga. Tveir fulltrúar fíkniefnateymis lögreglunnar koma á fundinn og fræða fundarmenn um ýmislegt varðandi fíkniefni og fíkniefnaneyslu svo sem aðgengi, einkenni og ýmislegt annað. Haustið 2016 var haldinn vel heppnaður fundur í Tjarnarborg með sömu aðilum og nú endurtökum við leikinn. Fundurinn er öllum opinn og eru foreldrar grunn- og framhaldsskólanemenda sérstakalega hvattir til að koma. Málið varðar okkur öll. Fulltúar sveitarstjórnar, heilbrigðisstofnunar, félagsþjónustu og hverjir þeir sem tilbúnir eru til að leggja hönd á plóginn eru hvattir til að koma á fundinn. Tökum samtalið um þennan vágest í samfélagi okkar - sjáumst mánudagskvöldið 29. apríl kl. 19.30 í Tjarnarborg Deildarstjóri fræðslu-, frístunda- og menningarmála. Grunnskóli Fjallabyggðar og Menntaskólinn á Tröllaskaga.

Skrifstofa skólans er lokuð frá 15. - 26. apríl. Gleðilega páska.

Í þessari viku líta nemendur í tölfræði upp úr kennslubókunum og skoða Skittlestölfræði. Verkefninu er ætlað að setja námsefnið, þ.e. tölfræðina, í aðeins skemmtilegra samhengi. Hvort það hefur tekist skal ósagt látið. Mörgum nemendum hefur reynst erfitt að sleppa alveg bókinni og vera sjálfstæð í dæmagerð og útreikningum. Ingu kennara hefur hins vegar fundist þetta mjög „gefandi“ enda mikið af Skittles í boði.

Sjö manna hópur úr MTR dvelur þessa viku í góðu yfirlæti í Istanbúl. Tilgangur ferðarinnar er að heimsækja Ömer Cam drengjaskólann í Asíuhluta borgarinnar. Einnig hefur hópurinn farið í skoðunarferðir, m.a. í gömlu Istanbúl og til borgarinnar Bursa í Anatólíu. Á morgun verður siglt um Bosporussundið milli Marmarahafs og Svartahafs og á laugardag heldur hópurinn heim með nýja reynslu í farteskinu.

Mælieiningar er nokkuð sem mikilvægt er að skilja og kunna að nota. Nemendur á starfsbraut æfðu sig á þessu í stærðfræðitíma í gær. Meðal annars með því að raða kubbum hverjum ofan á annan og hækka þannig turninn smám saman. Þetta gekk vel en þegar hann var orðinn 2,95 m. hrundi hann. Það vantaði aðeins 5 sm upp á að ná þremur metrum. Í þessu verkefni reyndi á grunnþáttinn sköpun í leik sem nemendur höfðu ánægju af og kepptust við að ná sem lengst í. Kennari í stærðfræðinni er Hólmar Hákon Óðinsson.

Hópur nemenda í áföngum um útivist í snjó og vetarfjallamennsku lá úti í Héðinsfirði um síðustu helgi. Í þessum hluta af náminu er tekist á við ýmsar áskoranir. Að þessu sinni varð hópurinn frá að hverfa í fyrstu tilraun vegna óveðurs. Allir voru komnir á upphafspunkt í Héðinsfirði þegar skall á stórhríð og ekki var annað að gera en fara heim. Daginn eftir var komið besta veður og var lagt af stað síðdegis. Gengið var í tvær og hálfa klukkustund niður að Vík með búnað á bakinu. Þar var tjaldað, kveiktur varðeldur, eldað og ýmis verkefni leyst. Nokkurt frost var um nóttina en hlýnaði með morgninum. Sumum var kalt en engum varð meint af og komu allir glaðir og heilir heim um miðan dag á sunnudag. Fjórum amerískum görpum á fjallaskíðum sem hópurinn hitti á heimleiðinni, þótti þetta áhugavert nám við einstakar aðstæður. Kennarar með hópnum voru Gestur Hansson og Kristín Guðmundsdóttir.

Tryggvi Hrólfsson, enskukennari í MTR hefur skipulagt samstarfsverkefni með kunningja sínum Anthony M. La Pusata, enskukennara í E. Majorana skólanum á Sikiley. Verkefnið snýst um að nemendur þar og hér ræði saman á enskri tungu í nokkrum kennslustundum. Í upphafi komu ítölsku nemarnir í heimsókn í nærverunum og skoðuðu skólann. Síðar í vikunni koma þau aftur í kennslustund og hugmyndin er að staðnemar spjalli við þau í litlum hópum eða maður við mann án þess að kennararnir séu að skipta sér af. Tilgangurinn er að æfa eðlilegt samtal á ensku og að nemendur kynnist menningu og lífsháttum hver hjá öðrum. La Pusata er Breti en hann og Tryggvi kynntust í erlendu samstarfsverkefni á síðasta ári.

Skólamenn á Norðausturlandi eru almennt sammála um að einstakar aðstæður séu á svæðinu til nýbreytni í samstarfi skólastiga. Þetta kom fram á samráðsfundi framhaldsskólanna á svæðinu fyrir helgina. Til hans var boðið sveitarstjórnarfólki ásamt stjórnendum grunnskóla, háskóla og símenntunarmiðstöðva. Frummælendur fjölluðu um efnið af sjónarhóli grunnskóla, framhaldsskóla, háskóla og símenntunarmiðstöðva. Pallborðsumræðum með þátttöku frummælenda stýrði Lára Stefánsdóttir, skólameistari MTR. Hún segir samtalið hafa verið gagnlegt og skýran samstarfsvilja mikilsverðan. Rætt var um sveigjanleg skil milli grunn- og framhaldsskóla og kosti þess að nemendur geti hafið nám í einstökum greinum fyrir útskrift úr grunnskóla eða útskrifast fyrir lok 10. bekkjar. Einnig var rætt um námsmat og hvaða upplýsingar felist í því. Á mörkum háskóla og framhaldsskóla var rætt um innihald stúdentsprófs og mikinn sveigjanleika í námsframboði framhaldsskóla eftir breytingar á námsskrá. Menn veltu líka fyrir sér kröfum til háskóla um að skilgreina með skýrum hætti þörf á undirbúningi fyrir háskólanám. Rætt var um samstarf framhaldsskóla og símenntunarmiðstöðva, raunfærnimat, aðlögun brotthvarfsnemenda að námi og sértækt nám í tengslum við vinnumarkaðinn. Samstarfsverkefni milli skóla og skólastiga voru rædd og lýstu menn miklum áhuga á samvinnu við þróun skólastarfs á Norðausturlandi. Framhaldsskólarnir í SAMNOR eru Framhaldskólinn á Húsavík, Framhaldskólinn á Laugum, Menntaskólinn á Akureyri, Menntaskólinn á Tröllaskaga og Verkmenntaskólinn á Akureyri

Í undirbúningi er að nokkrir nemendur og tveir kennarar leggi loft undir væng og bregði sér til Istanbúl, fjölmennustu borgar Tyrklands. Tilefnið er boð Ömer Cam drengjamenntaskólans í Asíuhluta borgarinnar. Sigurður Mar, listgreinakennari hefur kynnt sér allar aðstæður á þessum slóðum og mun fylgja nemendum til Istanbúl ásamt Karólínu Baldvinsdóttur, list- og raungreinakennara. Í morgun kynntu þau samstarfsfólki sínu tyrkneska tedrykkjusiði í morgunkaffinu. Skólastjórinn í Ömer Cam leysti Sigurð Mar út með tesetti og öðrum búnaði til tedrykku er þeir kvöddust á dögunum. Tyrkneski skólin er í glænýju húsi og aðbúnaður þar allur hinn besti. Nemendur eru um 320, þar af um 280 á heimavist.