Fréttir

Nemendur starfsbrautar brugðu sér suður á Reykjanes fyrir helgina og tóku þátt í hinni árlegu Hæfileikakeppni starfsbrauta framhaldsskólanna, sem að þessu sinni fór fram í Fjölbrautaskóla Suðurnesja. Framlag starfsbrautarinnar var stuttmynd sem nemendur höfðu tekið upp, klippt og gert algjörlega eftir sínu höfði auk þess að vera að sjálfsögðu aðalsöguhetjurnar. Myndinni er ætlað að gefa sýn inn í hið fjölbreytta starf sem unnið er á starfsbrautinni og þótti takast vel þrátt fyrir knöpp tímamörk, en hvert atriði í keppninni mátti ekki taka meira en um þrjár mínútur.

Landslag í Mývatnssveit, ekki síst tökustaðurinn hjá Fast 8, vakti mesta athygli dönsku gestanna úr Fjordvang ungdomsskole, í ferð til Mývatns á miðvikudag. Hópurinn gekk um Skútustaðagíga og Dimmuborgir, heimsótti Fuglasafn Sigurgeirs, Hverarönd og Jarðböðin. Einhverjir í hópnum eru að læra um fugla sem þátt í að öðlast skotvopnaleyfi og voru þeir áhugasamir að skoða safnið.

Söngkeppni framhaldsskólanna á Norður- og Austurlandi fer fram á Akureyri á morgun. Ólöf Rún, Marín Líf og Sólrún Anna tóku létta æfingu í anddyri skólans fyrir söngkeppnina í vinnutíma í morgun. Þær ætla að flytja blöndu af lögunum Love yourself með Justin Bieber og Photograph með Ed Sheeran.

Nemendur frá Danmörku úr Fjordvang Ungdomsskole heimsóttu okkur á sunnudag og verða hér fram á fimmtudag. Skólinn er samstarfsskóli sem hópur MTR-nema heimsótti á haustönninni. Gestirnir gista heima hjá okkar krökkum, það er skemmtileg áskorun fyrir alla og hefur gengið vel. Danirnir eru agndofa yfir landslaginu á Íslandi og þá sérstaklega fjöllunum sem umlykja okkur á Tröllaskaga.

Í stjórnmálafræði voru tveir nemendur með kynningar í morgun og fjölluðu báðar um afsögn Sigmundar Davíðs Gunnlaugssonar forsætisráðherra í kjölfar sjónvarpsþáttarins Kastljóss á sunnudag sem byggði á upplýsingaleka frá Panama. Aðalsteinn Ragnarsson fjallaði einkum um þá neikvæðu athygli sem málið hefur vakið í öðrum löndum.

Nemendafélagið bauð upp á veislu í morgunkaffinu. Á borðum voru marzipanterta og súkkulaðikaka. Runnu kökurnar ljúflega niður með súkkulaðikakói og rjóma eða eplasafa. Markmiðið – að allir færu glaðir inn í helgina - virðist hafa tekist prýðilega því allir voru mjög ánægðir með veitingarnar.

Mánudaginn 4. apríl hefst innritun eldri nemenda og fjarnema fyrir haustönn 2016. Stendur hún yfir til 31. maí. Eldri nemar (aðrir en 10. bekkingar) sem ætla að stunda dagskólanám innrita sig á menntagatt.is en þeir sem vilja stunda fjarnám innrita sig á innritunarvef skólans.

Nemendum í MTR eru farin að berast póstkort frá Singapúr sem svör við kortum sem þeir sendu þangað fyrr í vetur. Athyglisvert er að bera saman ólíkan stíl póstkorta hér á landi og austur þar. MTR-ingarnir notuðu mest landslag og mat á sín póstkort. Að austan koma hins vegar póstkort með stórum, nýtískulegum byggingum og fólki.

Í stjórnmálafræðiáfanga á öðru þrepi fjalla nemendur einu sinni í viku um þau mál af pólistískum og félagslegum toga sem hæst ber í fréttum. Ólína Ýr Jóakimsdóttir var með kynningu um ISIS í síðasta tíma og Ólöf Rún Ólafsdóttir um flóttamenn. Í umræðum eftir kyningarnar komu fram talsvert skiptar skoðanir um móttöku flóttamanna.

Í parkour eru engar reglur og maður keppir því við sjálfan sig segir Patrekur Þórarinsson, einn þeirra sem naut kennslu Hallgríms Þórs Harðarsonar í miðannarvikunni. Iðkendum þessarar íþróttar fer fjölgandi og fyrir marga verður það að lífsstíl að stunda hana á hverjum degi. Mikil ánægja var með námskeiðið í miðannarvikunni eins og myndirnar bera með sér