Fréttir

Nemendur í áfanganum ABC-skólahjálp hafa að undanförnu staðið fyrir ýmsum söfnunum til þess að hjálpa börnum í Úganda. Peningarnir sem safnast verða notaðir til þess að kaupa skólagögn og annan búnað sem nýtist börnunum í skólum þar. Nemendurnir stóðu fyrir söfnun fyrr í mánuðinum í Samkaup Úrval og Olís. Söfnunin stendur enn og söfnunarbaukar eru á báðum stöðum.

Hópur nemenda og nokkrir starfsmenn skólans skemmtu sér konunglega í leikhúsi á Akureyri í gærkvöldi. Uppfærsla Leikfélags Akureyrar á Gullna hliðinu eftir Davíð Stefánsson féll vel að smekk nemenda sem voru úr íslenskuáfanganum ÍSL3B og af starfsbraut. Fyrir sýningu naut hópurinn veitinga á pítsuhlaðborði Greifans.

Nokkrar MTR-stúlkur hafa síðan um áramót æft blak á Siglufirði undir merkjum Ungmennafélagsins Glóa. Æfingarnar hófust að þeirra ósk en æft er einu sinni í viku undir handleiðslu Önnu Maríu Björnsdóttur, blakþjálfara. Næsta mót hópsins verður Siglómótið en það fer fram laugardaginn 22.febrúar á Siglufirði og í Ólafsfirði.

Netnotendur hópast á Instagram og aðra vefi á flótta undan auglýsingum. Google og fleiri fyrirtæki eyða fúlgum fjár í að búa til einsleita hópa sem eru heppilegir fyrir auglýsendur. Þórarinn Stefánsson í Mobilitus sem var gestur í fjölmiðla áfanganum FÉL3F í morgun fullyrti að Google tapaði stórfé á þessari starfsemi.

Ljúfar veitingar voru fram bornar á fundi Matarklúbbsins Trölla fyrir helgina. Andri Mar Flosason, formaður klúbbsins kom með rétt sem hann eldaði eftir eigin uppskrift, sem hann kallar „a la Andri“. Mikael Már Unnarsson kom með Betty Crokker-köku með súkkulaðibitum. Báðir réttirnir fengu góða dóma og runnu ljúflega niður.

Snjóleysi og hlýindi hafa raskað kennslu í áfanganum ÚTI2A. Þær fimm vikur sem liðnar eru af önninni hefur æfing á gönguskíðum fallið niður í þrjú skipti af fimm. Í dag er alls ekki færi, rigning og jörð ýmist auð eða með blautum svellum. Lísebet Hauksdóttir, kennari í útivist, ákvað því að fara með nemendurna í sund.

Björn Þorláksson, ritstjóri Akureyri vikublaðs á Norðurlandi var gestur í fjölmiðlunaráfanganum FÉL3F í morgun. Þessi staðbundni miðill er að hefja fjórða árið sitt og hefur vakið athygli fyrir gagnrýna fréttamennsku. Þar liggur líka sóknarfæri blaðsins að mati ritstjórans sem segir að „Kínamúrar“ milli auglýsinga og ritstjórnarefnis hafi haldið. Auglýsendur geti ekki pantað viðtal við sig í blaðinu.

Kennsla í tölvuleikjafræði í MTR hefur vakið athygli og í gær kom Þórgunnur Oddsdóttir, fréttamaður í skólann ásamt Björgvin Kolbeinssyni, tæknimanni til að gera sjónvarpsfrétt um málið. RÚV-menn fóru í kennslustund hjá Tryggva Hrólfssyni í áfanganum „Tölvuleikir og leikjatölvur – saga þróun og fræði“ og tóku viðtöl við hann og nokkra nemendur.

Sex krakkar í vetrarfjallamennskuáfanganum ÚTI3A dvöldu á Bjarnargili í Fljótum við æfingar um síðustu helgi. Þau æfðu sig í ísklifri, klettaklifri, sigi og lærðu að nota ísexi til að stöðva sig í bratta. Einnig lærðu þau að ganga í öryggislínu. Leiðbeinandi í fjallamennskunni var Rúnar Gunnarsson en kennari í áfanganum er Lísebet Hauksdóttir.

Oculus Rift er nýtt sýndarveruleikatæki sem er sérstaklega hannað með tölvuleikjaspilun í huga. Tækið er fest á höfuð spilarans þannig að skjárinn er það eina sem hann sér. Auk þess hreyfist sjónsviðið í samræmi við hreyfingar þess sem spilar og gerir honum þannig kleift að sökkva sér enn frekar inn í veruleika tölvuleiksins.