Fréttir

Nýnemar voru boðin velkomin í dag en í MTR er ekki busavígsla heldur nýnemadagur sem einkennist af samveru og fjöri. Veðrið lék við nemendur í dag og dagskráin var hefðbundin. Fyrir hádegið var sápuboltamót og í hádeginu var grillveisla. Að því loknu fjölmenntu nemendur í sund.

Fyrsti kennsludagur annarinnar var í dag og mættu nemendur í fyrsta sinn eftir sumarleyfi. Jóna Vilhelmína Héðinsdóttir aðstoðarskólameistari bauð nemendur velkomin og miðlaði nauðsynlegum upplýsingum til nýnema og rifjaði upp fyrir þeim sem eldri eru.

Kennarar, stuðningsfulltrúi og þroskaþjálfi skólans eru nú á tveggja daga námskeiði hjá dananum Søren Hansen frá háskólanum í Álaborg. Hann er sérfræðingur í skapandi hugsun og hvernig hægt er að þjálfa nemendur í skapandi vinnubrögðum.

Nú er allt komið í fullan gang í skólanum eftir sumarleyfi. Kennarar eru við undirbúning náms en starfsfólk skrifstofu og stjórnendur eru mætt í hús til að vinna að sínum undirbúningi. Við hlökkum til vetrarins, margt spennandi framundan, margir erlendir gestir koma ásamt því að nemendur og kennarar verða á faraldsfæti.

Sumarleyfi á skrifstofu skólans er frá 17. júní til 2. ágúst. Innritun í fjarnám er lokið fyrir haustönn og næst fer innritun fram fyrir vorönn 2023 og hefst hún í byrjun nóvember. Þökkum öllum fyrir frábært samstarf á skólaárinu og hlökkum til að hitta alla í haust.

Sextán kennarar og þroskaþjálfi skólans er nú á endurmenntunarnámskeiði í Puerto de la Cruz á norðurströnd Tenerife. Megin viðfangsefni námskeiðsins er streita, að læra að þekkja streituvalda og að tileinka sér aðferðir til að vinna bug á þeim sem svo aftur minnkar hættuna á kulnun í starfi.

MTR fékk nýverið afhentan sinn annan grænfána en skólinn hefur verið grænfánaskóli síðan í september 2020. Grænfánaverkefnið alþjóðlegt umhverfismenntarverkefni sem á Íslandi er rekið af Landvernd. Það snýst um að auka umhverfisvitund með menntun og verkefnum innan kennslustofu og utan.

Í dag brautskráðust 37 nemendur frá Menntaskólanum á Tröllaskaga. Þar af eru tólf búsettir í Fjallabyggð en í meirihluta eru fjarnemar frá þrettán stöðum á landinu, einn býr í Frakklandi og annar í Danmörku. Þetta var 24. brautskráning skólans og alls hafa 464 nemendur lokið námi með formlegum hætti frá skólanum.

Á föstudaginn var mættu allir kennarar skólans á námskeið í notkun sýndarveruleika og tölvuleikja í skólastarfi. Að auki var kennurum frá VMA, FSH og Grunnskóla Fjallabyggðar boðið að vera með svo það var mikil líf í húsinu þennan föstudag.

Í dag opnar sýning á verkum nemenda i skólanum. Málverk og skulptúrar eru á veggjum skólahússins en stór hluti verkanna eru sýnd rafrænt. Þar eru t.d. lokaverkefni í ljósmyndun, tölvuleikjahönnun, frumkvöðlafræði, inngangi að listum og reyndar flestum áföngum sem kenndir voru á vorönninni.