Umhverfismál í öndvegi

Nemendur fara yfir stöðuna með kennurum sínum, Idu Semey og Karólínu Baldvinsdóttur. Ljósm. SMH.
Nemendur fara yfir stöðuna með kennurum sínum, Idu Semey og Karólínu Baldvinsdóttur. Ljósm. SMH.

Umhverfismál með tengingu við Heimsmarkmið Sameinuðu þjóðanna er viðfangsefni alþjóðlegs verkefnis sem hrint var af stað í vetur. Auk nemenda og kennara MTR taka skólar í Króatíu, Spáni og Portúgal þátt í verkefninu sem er styrkt af Erasmus+.

Verkefnið nefnist BBS eða Become a biomarker school. Markmiðið er að stuðla að aukinni sjálfbærni, aðgerðum í loftslags- og umhverfismálum í hverjum skóla fyrir sig. Einnig að efla tengslanet skólanna í sambandi við umhverfismál. Leiðarstef verkefnisins eru hin fornu frumefni; jörð, loft, eldur og vatn.

Eins og svo oft áður var skrifaður sérstakur áfangi fyrir verkefnið og nemendur hitta kennara sína vikulega en vinna sjálfstætt þess á milli. Á dögunum hittust allur nemendahópurinn á fjarfundi sem tókst mjög vel. Þar kynntu þau sig og sögðu frá áhugamálum sínum en aðal markmið fundarins var að kynna vinnu nemenda síðustu vikur.

Portugalarnir sýndu stuttmynd um skógareldana i Portúgal og vísuðu í frumefnin fjögur. Króatarnir báru saman loftslags- og umhverfismál í löndunum fjórum út frá tölfræðilegum upplýsingum. Þau kynntu einnig smáforrit eða app sem heldur utan um sorpflokkun í skólanum sínum. Spánverjarnir kynntu skólann sinn og sögðu frá Evrópuverkefnum sem hann hefði tekið þátt í og voru að auki með spurningaleik. Að lokum sýndi okkar fólk kynningarmyndband um skólann með enskum texta.

Framundan eru áframhaldandi verkefni og undirbúningur fyrir fyrstu námsferð verkefnisins sem verður til Portúgals í lok apríl. Verkefnið mun halda áfram næstu annir.